快閃巴黎3日2夜

年頭個friend突然話不如下星期去巴黎，咁唯有出走幾日，正所謂："若然現時士氣高昂，即管放肆任性。" 一個集合歷史、藝術、美食、購物，行程緊密豐富的三日兩夜巴黎之旅開始．．

基本資料／準備

雖然好突然，除了買機票同住宿外，其他的基本預備。

1. 留意天氣，一月的巴黎都係寒冷，或甚會落雨。睇下要帶幾厚既衫, 要穿什麼的鞋。

2. 法國的通用貨幣：歐元，銀行開通定Travel money, 或申請travel card。無咩特別，係唔會用到現金的。都唔好帶咁多現金，多扒手。

3. 漫遊數據電話

4. 法國的插頭：兩根圓形插腳　（Type C / E）

   

5. download定交通app：

   

6. 預訂門票，例如羅浮宮，好多人的，無可能WALK IN

7. 留意時差：法國快英國一小時

由曼徹斯特機場(MAN)出發

⥨　前往法國巴黎Paris-Charles de Gaulle airport (CDG)

是日乘坐EasyJet廉價航空，行李限制，每人１件，每件15公斤，體積不可超過45 X 36 X 20厘米

飛行時間：大約 1小時30分鐘

Day 1 傳統法國晚餐 / 夜遊巴黎鐵塔

中午機。落機去酒店，開始入黑，初到貴境，聽聞巴黎好危險，地鐵好多扒手，又話周街搶野，兩個小女子有小小聞風喪膽，第一日都uber出入。

住宿：Edgar Suites Bouchardon - Studio，超級舒適。

後記：1. 之後想再book，佢加左價，好貴了😞

2. 訂完先知係聽講係危險的第十區, 但其實一d都唔覺危險

傳統法國晚餐：Les Bouillons Chartier

朋友介紹，話好味，性價比高。真係好食既，所以好多人，侍應好忙，唔係好得閒理你，你唔好嗌佢，佢得閒會來搵你，叫佢比個英文餐牌都等好耐。總之，香港人，放鬆Ｄ，唔好心急，RELAX~~

夜遊巴黎鐵塔 (Eiffel Tower)

一去到梗係去地標打卡先啦！

Day 2 日遊巴黎鐵塔 / 凱旋門 / 畢加索美術館 / 拉法葉百貨 / 海鮮餐

日光的巴黎, 好優美, 由曼城來的大鄉里出省城。法國好似無肥人。

日遊巴黎鐵塔（Eiffel Tower）

時間關係，同畏高，無登頂，下次！

凱旋門（Arc de Triomphe）／香榭麗舍大道（Avenue des Champs-Élysées）

門票：成人每位16歐元

行左一條好長的迴轉樓梯上頂，行到三分一，開始有點後悔，唯有頂硬上！館內可了解法國的打仗的歷史，再登上頂層，可以360度俯瞰以凱旋門為中心12條的放射式大道，十分繁華！

午餐：無特別搵資料，在香榭麗舍大道上，求其入一間餐廳

好多人話巴黎好危險特別搭地鐵，咁我地想親身試下有幾可怕，我地覺得唔係講到咁危險，當然都要警覺留神，注意安全，袋好手機，特別係車門開的時候，唔會拎出來睇野。巴黎地鐵超方便快捷，月台／車箱好乾淨，無比較無傷害，倫敦地鐵確實比下去。

畢加索美術館

個人私心，逼一個無咩興趣既人去欣賞。

門票及開放時間，請自行到官網查詢

是次參觀，同場特別展覽Jackson Pollock的作品，好正！我都真係幾鐘意畢加索立體派抽象的風格。

拉法葉百貨（老佛爺百貨公司奧斯曼店　Galeries Lafayette Haussmann）

好高檔的shopping mall，嘩！好華麗！都好大！可能大型購物中心，個守衛好緊張，商場外，有好多持槍警察在巡邏。

商場頂樓開放睇風景。

晚餐：海鮮餐

去梁芷靈介紹過的平民海鮮餐 : ChaCha et Compagnie

味道：中等，要求唔高的我，我都好開心和滿足　

價錢：唔平　　

環境：可以

由朝去到晚，行了很多的路，回府休息，行程快將完結。

Day 3 羅浮宮／周邊商場／夜機回程

羅浮宮（Palais du Louvre）

必去景點，點都要去一去朝聖，見下蒙羅麗莎，感受一下藝術既氛圍。雖然買左門票同預訂左時間，去到都要排長龍先入到去，超誇張。

人人都爭相拍攝女神蒙羅麗莎的微笑，真係個個都影蒙羅麗莎，唔通個個都鐘意蒙羅麗莎咩！

逗留左都大半個上午，好多展品，好擠擁，走馬看花咁睇左好多名畫。

午餐：正確來說，我地無食正餐，瘋狂咁品嚐法國的蛋糕，嘆啡

最後購物：Westfield Forum des Halles

由羅浮宮步行到Westfield Forum des Halles大型購物中心，約十分鐘路程，加上商場連接Châtelet – Les Halles地鐵站, 可乘搭B線，車程約36分鐘，直達CDG機場。預好時間，就去機場啦！

地鐵收費

單程地鐵／RER市區段：2.5歐元

往返機場，每程 13歐元

全日通(全區,不包括機場)：12歐元

*可用有NFC手機下載Île-de-France 或 Bonjour RATP購買車票, 或車站自動售票機/售票櫃購買實體增值卡Navigo Easy (實體卡購買費為 2歐元)，操作簡單。

支出大公開

自行消費購物，另計。如果當初唔搭uber，應該可以玩平ｄｄ！最緊要係享受。支出費用只供日後參考和記錄。

後記

整體對巴黎的感覺，十分良好，道路寛敞，有規劃，乾淨。治安比想像的安全，當然我們都相當的謹慎，冬天去，貴重物品容易收藏在大褸內。食嘢同英國一樣唔平，以歐元計算，會平少少。三日兩夜行程，只能重點式，還有很多的景點和美術館，都無去到！留待下次再探索。

補充：由於期間英國實施左ETA電子簽證，巴黎離境時，航空公司要我show返個evisa比佢確實身份，移英港人需要注意。

旅程日期：13-15/2/2025