環遊英國21天(4) - 倫敦五天遊 Day 4 -巨石陣/巴斯

行程：參加巨石陣、巴斯本地一天團 ／ 夜遊SOHO區

天色稍為陰暗，微雨，稍有影響心情，不過今日最爽最輕鬆。參加Stonehenge and Bath Tour本地團，唔洗用腦，坐車又可以瞓覺，大爽！

---

巨石陣、巴斯本地一天團 (Stonehenge and Bath Tour)

大約半個月前，決定報名參加Golden Tours的Stonehenge and Bath Tour, 旅遊團有不同語言、日期、年齡組別及入場費組合，詳情請自行查詢，不能盡錄。

於網上付款後，會收到電郵的確認及附件PDF的Entry Voucher，通知集合時間和地點。出發前三日再有電郵再次確認。

集合時間：08:15AM

旅遊巴離開時間：08:30AM

集合地點：Bus Stop 4, Bulleid Way, 123-151 Buckingham Palace Rd, Victoria, London, SW1W 9SR

由於本人都係第一次，同帶住咁多人，我係怯既，早咗少少去到現場，搵到個位，心就定了。所以8:15集合，7:30就到左！咁好彩有地方可以坐下飲咖啡，食早餐，去定廁所。

其實都好簡單既, 搵到個有蓋的巴士站，一入去都見到好多Golden Tour的牌，時間差不多，工作人員就會安排，係邊個巴士站等候，一日都好多團。好準時點名同開車，唔好遲到呀！

出發啦！導遊都幾靚仔，聽唔到佢講乜，望落都醒神一點。第一站前往巨石陣，車程都要兩小時。好彩導遊在車箱內講解一陣之後，都比車上的團友安靜，一團大約20人，一人坐兩個位，好寬敞！

---

巨石陣 (Stonehenge)

世界奇觀之一的巨石陣，睇相睇得多，真係好壯觀！但到諗行程時，都考慮咗好耐，山長水遠去睇幾舊石頭，到底值唔值得呢? 菜太去到會唔會潑冷水地咁講：＂吓！就咁架啦！＂，經過長時間思考同諮詢，奇景係要去到此一遊！長見識！

後記，睇咗老高與小茉講解超級巨石陣，我就再了解多一點了。

首先，去到巨石陣的旅客中心，內裡有介紹巨石陣歷史和考古的展館，另外，轉乘巨石陣接駁巴士前往景點，好多人排序，如果自己步行，我諗要行半小時。當然直接去搭車前往景點，如有時間再入展館，逗留時間約２小時，真係到此一遊，打卡影張相。

巨石陣在不同天色下展現不同壯麗景觀。是日天氣陰沉讓巨石陣顯得格外憂鬱！

---

巴斯小鎮（Bath) ／ 羅馬浴場（The Roman Baths）

上返旅遊巴，大約一小時車程，到達了巴斯小鎮，靚仔導遊帶我們走進小鎮，講解當地的特色和歷史。小鎮歷史悠久，不少建築外牆顯得有些污舊。重點景點：羅馬浴場，於羅馬浴場開始自由活動，四點集合！

羅馬浴場（Roman Baths）是古羅馬時期的公共浴場，建於公元1世紀，以天然溫泉聞名。羅馬人相信溫泉水有治療效果，能幫助治療疾病，因此他們在這裡洗浴、放鬆身心。

---

導遊推介：巴斯麵包

始於1680年的老店Sally Lunn's。又食到新野，巴斯麵包，麵包鬆軟，包上搭配各種不同的配料，超得！加上服務態度超好，專業。還擔心趕不及集合時間，好彩，都快出餐。

Sally Lunn's 是位於英國巴斯市中心的著名茶餐廳，建築是巴斯最古老的房屋之一。廚房博物館展示了胡根鬆派麵包師 Sally Lunn 在喬治時代使用的廚房，她創造了首個巴斯麵包（Bath Bunn），這種地方特色美食如今聞名全球。

在美好的一天中，本人竟然不幸中了頭獎：鴿子飛過頭，倒頭淋了一兜雀屎！Why Me? 這次事件教訓了我，要聽阿媽話：擔遮！

準備回程，放工時間，都無咁準時，有點塞車，大約六點幾返到倫敦市中心。

---

夜遊SOHO區

歡迎晚上有新團友加入行程，今日團友們行的路唔係好多，跟團輕輕鬆，回民宿稍作休息，見大家有點精神體力，仲想繼續玩，一於夜蒲SOHO區，睇下夜景，倫敦夜繽紛。Oxford Circus的商店一般於晚上9時關門。

前往地鐵站：

交通便利，主要有幾個地鐵站（Underground）,步行幾分鐘可前往SOHO區一帶，包括Tottenham Court Road Station, Oxford Circus Station及Leicester Square Station

是日旅程圓滿結束！明天請早！